वसुबारस

 गाय वासरू नाते

साऱ्या नात्याहूनी थोर.

प्रेम वात्सल्याचा झरा

वाहतो चौफेर.

 नात्यातील गोडवा

असाच अखंड वाढत जावा

वसुबारसेच्या  पूजनाने

दिवाळीचा सण मंगलमय व्हावा

ज्योत

 इवल्याशा दिसणाऱ्या ज्योतीकडून

आपण खरच खूप काही शिकाव .

आयुष्य जरी क्षणिक असल तरी

अवघ्या तीमिराला दूर करण्याचं स्वप्न

मनात नेहमीच फुललेलं असावं.

पानं

 आयुष्यातील काही पानं

 खरंच काळजाच्या कुपीत

हळुवारपणे जपावीत.

आठवणींच्या हिंदोळ्यावर झुलताना

त्यांच्यातील हिरवाई नव्याने  पुन्हा अनुभवावी

आव्हान

 पराभवाच्या छायेत वावरताना ही

जग जिंकल्याच्या थाटात राहता यावं

आयुष्यातील प्रत्येक आव्हान

असच हसतमुखाने पेलता यावं

आभाळ

 आभाळ मुकं होण्याआधी

त्याला मनसोक्त बरसून द्यावं

त्याच्या प्रत्येक सरीत भिजण्याचं सुख

आपलं आपणच क्षणोक्षणी अनुभवावं

शिदोरी

 अनुभवांची शिदोरी गाठीशी असेल तर

अवघड रस्तेही सहज पार होतात.

प्रत्येक वळणावरच्या सावल्या ही मग

आपल्या यशाच्या भागीदार बनतात

नशीब

 नशिबाचे फासे पलटवायचे असतील तर

प्रयत्नांची चाके आपली आपणच 

फिरवावी लागतात

तेव्हा कुठे यशाचे पक्षी

आपल्या अवतीभवती मंजुळ गाणी गातात

सावली

 एक मार्ग बंद झाला तरी

यशाचे असंख्य मार्ग खुले होतात.

प्रामाणिकपणे चालणाऱ्या पावलांना

वाटेतील सावल्या सुद्धा दिशा दाखवतात.

झरा

 नव्या क्षणाच्या स्वागतासाठी

सदैव हसतमुखाने सज्ज राहा.

अंतरात नवचैतन्याचा

सदा वाहत राहू दे झरा.

धडपड

 मनाची चालू असलेली प्रामाणिक धडपड

जेव्हा पावलांना कळते

तुमच्या यशाचं बीज तेव्हाच

इथल्या मातीत रुजते

आव्हानं

 आव्हानं पेलायला शिकलेले हात

कधीच थकत नाहीत.

आणि स्वप्नांचे परीघ भेदायला निघालेली पावलं

कधीच माघारी फिरत नाहीत

सहप्रवासी

 अंधारानचं तर शिकवलंय

तेजाचा सहप्रवासी बनायला

स्वतः च हलकासा कवडसा बनून

अंधाराला विराम द्यायला

सन्मान

 कर्तुत्वाचा आलेख इतका उंचावत जावा की

सन्मानाचा ही सन्मान व्हावा.

प्रगतीच्या पाऊलखुणानी

सतत नवा इतिहास लिहावा

कोजागिरी

 चंद्राच्या मंद प्रकाशात

 अवघा चराचर उजळून निघावा.

विश्वासाच्या स्वादाने

गोडवा नात्यांचा वाढावा

प्रकाशवाटा

 मनातील प्रकाशवाटांनी

सगळा काळोख गिळून घ्यावा.

आयुष्यातील प्रत्येक क्षणाने

तेजोमय इतिहास रचावा

अस्तित्व

 स्वतः च अस्तित्व स्वतः लाच 

निर्माण करता आलं पाहिजे.

आयुष्याचं गाणं कसं का असेना

पण सुरेल आवाजात ते गाता आलं पाहिजे

आनंद

 आयुष्यातील प्रत्येक क्षणाचा

मनमुराद आनंद घेत राहायचं.

क्षण कसा का असेना त्याला

सकारात्मकतेचा आकार देत राहायचं.

विजयादशमी

 दारी झेंडूचे तोरण

अंगणी सडा सारवण

घरात आनंदाचं उधाण

सदा घरात नांदावे

सुख समाधान.

सोन्यापरी अस्तित्वाला

झळाळी तुमच्या यावी.

दुर्गुणांचा नाश होऊनी

यावी आयुष्याला झळाळी

धडपड

 धडपडत का होईना

 उभं राहायला शिकलं की

आपोआप चालायला येतं.

आणि चालायला शिकलेल्या पावलांनी मग

यशाचं शिखर ही अलगद नजरेच्या टप्प्यात येतं.

संयम

 कोणतीच वेळ कायम रहात नाही

आपण फक्त संयम बाळगून राहायचा.

येणाऱ्या प्रत्येक अनुभवातून काहीतरी

सकारात्मक शिकत

आयुष्याचा प्रवास योग्य दिशेने करत राहायचा.

आत्मविश्वास

 मनापासून प्रयत्न केले की

अवघड कामं ही

लिलया पार पडतात.

एका आत्मविश्वासाच्या जोरावरच

यशाच्या इमारती उभ्या राहतात.

कृतज्ञता

 साथ देणाऱ्या आणि साथ सोडणाऱ्या

दोन्ही ही हातांपुढे

नम्रता पूर्वक झुकता आलं पाहिजे.

आयुष्यातील प्रत्येक नात्याला

कृतज्ञ भावनेने जपता आलं पाहिजे.

समाधान

 तुझं समाधान आणि हसणं

घराला नवचैतन्य देत राहतं.

तुझ्या एका हसण्यानं

सारं घरसुद्धा आनंदात न्हाऊन निघत.

प्रेम, माया, ममता

 तुझ्या हृदयातील

प्रेम ,माया ,ममतेचा सागर

कधीच आटून देऊ नकोस.

पण मायेला उधाण आणताना मात्र

माणूस पारखून घ्यायला विसरू नकोस

स्वाभिमान

 स्वाभिमानाने आणि ताठ मानेने

जगात सहजतेने वावरता यावं

तुझं कर्तृत्व इतकं नितळ, स्वच्छ

आणि स्वतःच्या मेहनतीवर मिळवलेल असावं.

निर्भयता

 बन तू निर्भय आणि

उचल हाती शस्त्र.

तुझा लढा लढण्यासाठी

तुलाच बाहेर काढावं लागेल तुझं ब्रह्मास्त्र

उभारी

 लढता लढता हरल्याची

खंत का मानावी.

या हरण्यातुनच तर मनाला उभारी मिळते

पुन्हा उंच उडण्याची

झाड

 संघर्षात वाढणारं प्रत्येक झाडं

खरचं खुप जोमाने वाढत.

म्हणूनच तर  ते 

मोठमोठ्या वादळातही 

तग धरून राहत.

अस्तित्व

 तापलेल्या या उन्हात

अस्तित्व माझे जपेन मी.

भेदून बंध भावनांचे

मुक्त आभाळी विहरेन मी

पालवी

 छाटले जरी पंख कितीदा

पुन्हा आकाशी उडेन मी

पालवी होऊन पुन्हा

नित नव्याने बहरेन मी

गांधी जयंती

 सत्य, अहिंसा अन् शांतीचा

मूलमंत्र आम्हाला दिला.

बापू तुमच्या मुळे आम्हाला

मानवतेचा अर्थ कळाला.

आस ठेवुनी स्वातंत्र्याची

कणकण देहाचा तुम्ही झिजवला.

भारतमातेचे वीर सुपुत्र तुम्ही

प्रणाम आमचा तुम्हाला.