मावळतीचा सूर्य

 उगवतीच्या सुर्याइतकाच

मावळतीचा सूर्य ही सुंदर असतो.

नकारात्मकतेकडे ही सकारात्मकतेने पाहण्याचा

जणू मूक संदेशच देऊन जातो

वसंत

 दुःख उगाळीत बसण्यासाठी

आता कुणाला उसंत

 माझ्यातच फुलतो आहे

रोज नवा वसंत.

शून्य

 आयुष्य जेव्हा शून्य होऊन जातं

तेव्हा स्वतः ला खरचं खूप भाग्यवान समजाव.

त्या शुन्यापुढे किती ही मोठी संख्या लिहिण्याच सामर्थ्य

आपल आपणच आपल्यात निर्माण करावं

अस्तित्व

 एकट्यानेच वाट चालायला सुरुवात केली की

नव्या वाटा आपोआपच निर्माण होतात

या नव्या वाटाच तुम्हाला

तुमच्या नव्या अस्तित्वाची जाणीव करून देतात

ओंजळ

 स्वप्न बघण्याची ताकद निर्माण झाली की

पावलं आपोआपच मार्गक्रमण करतात.

अवघड वाटणारी स्वप्नही मग

अलगदपणे ओंजळीत येऊन विसावतात.

स्वप्न

 बाजारातून स्वप्न विकत घेण्यापेक्षा

आपली स्वप्न आपणच निर्माण करावी.

स्वतःच्या कष्टातून पूर्ण झालेल्या स्वप्नांची गोडी

मग क्षणोक्षणी आपली आपणच अनुभवावी

प्रजासत्ताक दिन

 श्वास तिरंगा

ध्यास तिरंगा

अभिमानाने फडकत राहणाऱ्या

प्रत्येक भारतीयाची आन बाण अन् शान तिरंगा.

सन्मान आमच्याकडून नित्य घडावा

तिरंगा आमचा अभिमानाने

अखंड ,अविरत फडकत रहावा

प्रजासत्ताक दिनाच्या हार्दिक शुभेच्छा

नजर

 आभाळाशी नातं जोडताना

पडू नये जमिनीचा विसर.

उंच उडण्याच्या स्वप्नालाही लागते मग

उन्मादाची नजर

झंझावात

 थांबला झंझावात अन्

निश्चयाने पाऊल पुढे पडले

मनात नव्याने स्वप्न उषेचे

पुन्हा फुलू लागले

प्रहार

 अंधारल्या मगरमिठीतून

नवसूर्याचा उदय व्हावा.

जणू भेदण्या व्यूह अविवेकाचे

काळानेच त्यावर प्रहार करावा

स्वयं प्रकाश

 मनानं एकदा स्वयंप्रकाशीत व्हायचं ठरवलं की

प्रेरणेसाठी उसण्या प्रकाशाची

आवश्यकताच भासत नाही.

जग आतूनच उजळून निघत असल्याने

मनाला अंधाराची भीतीच उरत नाही

स्वप्न

 आत्मिक सामर्थ्याच्या जोरावर

पुढे जात राहील की

यश आपोआप कवेत घेतं.

गोठलेल स्वप्नही मग

नव्याने वेगवान होऊन वाहू लागत

कसोटी

 सत्याची नेहमीच कसोटी लागते

असत्य नेहमीच झुकते माप घेऊन पुढे जाते

आपण फक्त योग्य वेळ आणि काळ यायची वाट बघायची

कारण असत्याची आयुमर्यादा कधीच जास्त नसते

वादळ

 वादळाकडे बघून पाठ फिरवण्यापेक्षा

स्वतः च वादळ बनून आव्हानाला सामोरं जावं 

त्यानंतर मिळालेल्या आत्मविश्वासाच्या जोरावर मग

मनातलं प्रत्येक ध्येय पूर्ण करावं

कुंपण

 जाणूनबुजून दुर्लक्षित केलेली झाडचं

खरंतर उंच उंच वाढतात.

आणि सगळ्याच बाजूंनी सुरक्षित कुंपण मिळालेली

आधार काढून घेताच आपोआप नष्ट होतात

संदर्भ

 येणारा प्रत्येक दिवस

एक नवा अनुभव देऊन जातो.

आयुष्यातील बदललेल्या संदर्भांशी

आपली जणू ओळखच करून देतो

सावली

 सावली जेव्हा साथ सोडते तेव्हा

आपणच सावली बनावं.

अन्  आपल्या पंखाखाली इतरांना घेऊन

त्यांच्या मनात एखाद्या ज्योती प्रमाणे तेवत राहावं

आवर्तन

 वेदनांची आवर्तने  जितकी जास्त

तितके पाय मजबूत बनत जातात

गोठलेल्या वाटेवरून ही मग ती

 सहजपणे इच्छित स्थळी पोहोचतात

मकर संक्रांत

 तिळगुळाचा गोडवा

नात्यात आपल्या यावा

तिळाप्रमाणे वाढणाऱ्या

दिवसागणिक नात्यातील

स्नेह वृद्धिंगत व्हावा.

सुख समृध्दी घेऊन

प्रत्येक प्रभा उगवावी

मकसंक्रांतीच्या शुभदिनी

तुमची ओंजळ यशाने भरून जावी

पाऊस

 मनातला पाऊस अचानक आज

ओठांवर येऊन बरसला.

काही ही झालं तरी साठून न राहता

अखंड वहात राहायचं

जणू हेच सांगण्यासाठी तो आला

यश

आभाळाच्या लेकरा तुला

भीती रे कुणाची?

दाही दिशा तुझ्यासाठी

दारं खोलतील यशाची

प्रवास

 मागे बघायला आता वेळ कुणाला ?

अवघे आभाळ आता खुणावत आहे

ओंजळीत भरलेल्या स्वप्नांचा प्रवास

आता बोलावत आहे

यश

 जेव्हा प्रयत्न प्रामाणिक असतात

तेव्हा यशालाच तुमच्या कडे यावं लागतं.

कोणत्याही आधाराच्या कुबडी शिवाय

तेच तुम्हाला ताठ मानेने उभ राहायला शिकवतं.

गाणं

 पापणीआडच गाणं

पापणीच्या आतच गुणगुणत राहायचं.

पापणीच्या बाहेर मात्र

अखंड हास्याची मस्त तान छेडत राहायचं

सामर्थ्य

 सामर्थ्याचा एक दिवा

मनात अखंड तेवत रहावा.

ज्योतीने त्याच्या आजूबाजूचा

परिसर अखंड चैतन्यदायी व्हावा

सुख दुःख

 सुख उतू जाण्याआधी

त्याला काठावरच थांबवावं.

दुःखाला ही सोबत घेऊन

दोघांच्या साथीनेच मग

आयुष्याचं नवीन गाणं लिहावं

ऊर्जा

 कोण जाणे कशी अचानक

एक अनामिक ऊर्जा येते

क्षणात मनात आनंदला

पुन्हा नव्याने उधाण येते

ओंजळ

 

हल्ली मला पाहून आव्हानांना सुद्धा

घेरी येऊ लागते.

अवघड वाटेवरील यश सुद्धा मग

अलगद माझ्या ओंजळीत येऊन थांबते.

सावित्री बाई फुले जयंती

 स्त्री शिक्षणाचा पाया रचण्या

अपार कष्ट सोसले

शब्दांचे झेलूनी घाव

अखंड ज्ञानदानाचे कार्य केले.

तुमच्या पुण्याईने आज

अनेक सावित्री घडत आहेत.

लेकी तुमच्याच बनून लढवय्या

शिखरे यशाची गाठत आहेत

वसा अखंड हाच चालावा

या देशातील प्रत्येक सावित्रीचा

जन्म अखंड सार्थकी लागावा

नवा रंग

 नव्या वर्षात सारेच गुंते

नव्याने सुटले

ओळखीच्या चेहऱ्यांचेही

नवीन रंग बघायला भेटले.

आता या नवीन रंगांसह नव्याने

पुन्हा झेप घ्यायची

यशाची चढती कमान

सतत चढतीच ठेवायची